CEBU, Philippines - Gikasagmuyo sa mga drayber sa mga trak sa basura nga sakop sa Department of Public Services ang pag-isyu kanila og citation tickets sa dakbayan sa Mandaue atol sa ilang pag-agi.
Gipahibalo kagahapon ni Engr. Dionisio Gualiza sa Department of Public Services nga ang Traffic Enforcement Agency of Mandaue (TEAM) sa siyudad sa Mandaue misitar sa iyang mga sakop tungod sa pasangil nga nagtagaktagak sa dalan sa Mandaue ang karga nilang basura.
Ang mga garbage trucks sa dakbayan sa Sugbo moagi gyud sa pipila ka parte sa Mandaue paingon sa sanitary landfill sa lungsod sa Consolacion.
Aron dili na masubli ang maong insidente gimandoan ni Gualiza ang mga drayber sa garbage trucks sa siyudad nga kinahanglang tabunan gyud nila ang gipangkarga nila nga basurahan. Sa laing bahin, nakalitan si Gualiza sa gipatumang truck ban sa Mandaue gumikan kay wala sila pasidan-i sa dihang giplano pa kini hinungdan nga dunay mga garbage trucks ang nangadakpan sa miaging adlaw.
Nagkanayon si Gualiza nga importante gyud unta kaayo ang koordinasyon sa mga local government units sama sa pagpahibalo sa nagkadaiya nilang patakaran sa tagsa-taga nila nga hurisdiksyon. Ang truck ban sa Mandaue magsugod alas-6 ngadto sa alas-8 sa buntag ug alas-5 sa hapon ngadto na sa alas-8 sa gabii. (BANATNEWS)