Naga City naningil sa CPA

CEBU, Philippines - Gipaninglan sa dakbayan sa Naga ang Cebu Ports Authority (CPA) og “equitable share” kabahin sa mga barko nga mi-angkorahi o mipundo diha sa kalawran ug sa mga pribadong wharf nga sakop sa siyudad.

Ang gibasehan sa maong pagpaningil sa Naga mao ang Section 291, Chapter 2 sa Title Three sa Akta Republika 7160 sa Local Government Code (LGC) diin gipadayag niini mao ang paghatag og bahin sa mga ahensiya sa kagamhanan o mga Government-Owned o Controlled Corporation (GOCC) ngadto sa Local Government Units (LGUs).

Ang maong balaod nagmandong kinahanglang makadawat og bahin ang usa ka lokalidad gikan sa kinitaan sa mga GOCCs nga nagbase diha sa maong mga lugar.

Si Mayor Valdemar Chiong sa iyang suwat kang Engr. Dennis Villamor, General Manager sa CPA niadtong Enero 18, 2012 nagkanayon kini nga ang siyudad sa Naga walay gidumalang kaugalingong pantalan apan giampingan nilang dili maguba ang mga coastal resources sa siyudad tungod sa ubang mga cargo vessels nga moangkorahe sa ilang dapit.

Matud sa mayor nga pila na ka tuig ang nakalabay ang siyudad sa Naga wala hatagi og bahin sa CPA nga usa ka porsiyento sa tinuig nga kinitaan sa maong GOCC aron madugang sa pundo sa panudlanan sa siyudad. (BANATNEWS)