Gi-salvage gihagbong sa Manipis

CEBU, Philippines - Usa ka wala mailhing lalaki kinsa gituohang gi-salvage ug gihagbong sa kilid sa railings daplin sa karsada ang napalgan kagahapon sayo sa buntag diha sa barangay Manipis, dakbayan sa Talisay.

Ang maong biktima gibana-banang nagpanuigon sa 18 ngadto sa 22-anyos nagsul-ob og kolor blue nga shorts nga dunay kombinasyon nga yellow ug dark violet nga t-shirt. Ang nahisgutang lalaki nakaangkon og samad pinusilan sa likod nga bahin sa iyang ulo ug ang bala milahos ngadto sa walang bahin sa iyang ilong ug laing duha ka samad pinusilan sa tuong bahin sa iyang buko-buko diin ang usa ka bala miungot diha sa walang bahin sa iyang lawas.

Sila si SPO4 Daniel Tarucan, SPO2 Elmer Saladas ug PO3 Ferdinand Pablo nga miresponde sa maong alarma mibutyag nga dunay mga residenteng nakadungog sa tingog sa makina sa motorsiklo sa maong lugar.

Si Tarucan nga nahinabi sa Banat News kagahapon mibutyag nga usa ka residente ang nakabantay sa hinay nga andar sa motorsiklo kagahapon sa ala-una sa kaadlawon padulong sa Poblacion.

Ang maong motorsiklo adunay duha ka mga lalaking sakay ug ang pasahero giingong nakiglalis sa drayber sa motor ug misunod dayon ang butobuto sa armas.

Human sa maong mga butobuto nakabantay kini nga gipawong ang makina sa motor ug mga lima ka minutos ang nakalabay gipaandar kini og balik ug mipalayo ngadto sa Poblacion.

Matud usab ni Tarucan nga nianang pagka-alas 5:00 sa buntag gisubay sa maong residente ang dapit diin iyang gituohang mihunong ang motorsiklo ug diha nalang niya makita ang lama sa dugo sa karsada.

Gisubay kini sa mga residente ug diha nila makita ang patay’ng lawas sa biktima nga nagbuy-od mga tulo ka metros gikan sa railings sa daplin sa dalan nga daw gihagbong o gipaligid paubos.

Ang kapolisan naka-recover og duha ka slugs sa mga bala diha sa lugar nga nahitaboan.

Ang patay’ng lawas gikatakdang ipaawtopsiya samtang gipalawman pa sa kapolisan ang imbestigasyon pag-ila sa biktima ug pagtumbok sa mamumuno niini. (/EIM)  (BANATNEWS)