Motor nadasmagan sa trak 1 patay

CEBU, Philippines - Patay ang usa ka tawo dihang napunggit ang motorsiklong iyang gisakyan sa delivery truck sa softdrink diha sa dalan M.C. Briones sa barangay Tipolo, dakbayan sa Mandaue alas- 5 pasado sa buntag niadtong miaging adlaw.

 Ang biktima mao si Niel Sinoy Abacial, 34, taga sitio Puso, Brgy. Busay sa dakbayan sa Sugbo ug ang nakadasmag kaniya mao ang delivery truck sa Coca Cola Bottlers Corporation nga gimaneho ni Amil del Socorro Latonio, 36, taga sitio Wireless sa barangay Subangdaku sa maong dakbayan.

Si PO1 Jeffrey Alpas sa traffic division sa Mandaue City Police Office (MCPO) nga nahinabi sa Banat News miingon nga gikan sa lungsod sa Consolacion si Abacial paingon kini sa dakbayan sa Sugbo.

Sa paghidangat sa atubangan sa nahisgotang kompaniya sa softdrink kalit kining nabanggaan sa nahisgutang trak nga padulong na sa iyang pagliko paingon sa lungsod sa Consolacion.

Matud pa ni Alpas nga gumikan sa kakusog sa panagbangga nalamba sa karsada ang motorsiklo ug ang biktima. Si Abacial gidala sa drayber sa maong delivery truck ngadto sa Mandaue City Hospital apan gideklarar kini nga dead on arrival.

Ang trak temporaryong gibutang sa impounding area sa kapolisan samtang gihikay pa ang kaso batok sa mitahang drayber kinsa gibilanggo karon sa Presinto 2 sa Subangdaku Police Station.  - BANAT NEWS