Inahan ug anak mapriso tibuok kinabuhi

CEBU, Philippines - Pagkapriso sa tibuok kinabuhi maoy nakab-ot nga desisyon ni RTC-Branch 6 Judge Ester Veloso batok sa manag-inahang babaye nalambigit sa kasong human trafficking.

Sa 15-ka pahina nga desisyon ni Veloso iyang gikombikto ang duha ka babaye kini bisan sa pangangkon sa duha nga may pagtugot sa mga ginikanan ang walo ka batang babaye ug usa ka lalaki.

“This (pagtugot) does not absolve the criminal liability of the accused, pursuant to the definition of the crime,” matud pang Veloso may labot sa Republic Act 9208 kon Anti-Human Trafficking Act.

Ang maong mga bata nga taga Cagayan de Oro City nagpangidaron pa og 14 ngadto na sa 17-anyos kinsa positibong mitumbok sa duha nga maoy mi-recruit kanila aron patrabahuon sa kaulohan.

Si Veloso mirekomendar og pagkapriso sa tibuok nilang kinabuhi og P2 milyones isip multa.

Ang mga suspek nadakpan diha sa pantalan sa dakbayan sa Sugbu niadtong bulan sa Nobiyembre dihang nasigpatan sa mga awtoridad ang mga bata ug gitug-anan kabahin sa ilang lakaw uban sa mga suspek.  - BANAT NEWS