Aduna nay resulta sa lie detector test

CEBU, Philippines - Migawas na ang resulta sa polygraph test (lie detector test) sa mga empleyado sa Sinulog Foundation Incorporated usa ka semana human sila mopailawom niini diha sa buhatan sa National Bureau of Investigation-7 nunot sa pagpanglungkab sa maong buhatan ug nadala sa mga kawatan ang P1.6 milyones.

Si Sr. Supt. Melvin Ramon Buenafe, hepe sa Cebu City Police Office (CCPO) mitug-an sa mga tigbalita nga migawas na ang resulta sa polygraph test ug anaa na karun sa Cebu City Prosecutors Office.

Wala hinuon mobutyag si Buenafe kung si kinsa o kung duna bay nahagbong sa maong test sanglit dili man gihapon kini magamit nga ebidensya sa husay sa kaso gawas lang isip suporta lang sa pagpalig-on sa kaso.

Giangkon ni Buenafe nga daghan kaayong mga pagduhaduha sa maong pagpanglungkab apan siya mipasabot nga trabaho ra ang ilang gihimo aron matumbok ang responsable sa maong krimen.

Kahinumduman si Joselyndo Jabagat guwardya sa Sinulog Foundation sulod na sa dul-an 16 ka tuig ug sakop sa GDS Security and Detective Agency maoy gipasakaan sa kapulisan og kasong theft human sa mga pamahayag sa mga empleyado nga medyo duol-duol nga nagtumbok kaniya nga maoy kakunsabo sa mga kawatan aron lungkabon ang ilang buhatan.

Si Jabagat gihatagan sa piskal og napulo ka adlaw aron tubagon ang pasangil batok kaniya.

Apan si Gloria Lastimosa Dalawampu, abogado ni Jabagat malaumon nga mabasura ang kaso sa iyang kliyente diha palang sa piskaliya sanglit gihulagway niini nga kuwang ang basehan aron iduot ang iyang kliyente.  - BANAT NEWS