23 ka vintage bombs pabuthon

CEBU, Philippines - Padayon ang pagpangita sa mga awtoridad og lugar diin mahimong pabuthon ang 23 ka mga vintage bombs human wala makapasar ang usa ka kanhi quarry site sa Sitio Rocky Hills , sa Brgy. Poente sa lungsod sa Carmen nga una nila napilian alang sa maong plano. Ang maong vintage bombs nakuykuyan sa mga nagtrabahong construction workers diha sa South Road Properties (SRP) sa miaging adlaw. Ang mga staff sa buhatan ni Mayor Michael Rama nga gipangulohan ni Philip Zafra mihimo og site inspection sa Carmen kagahapon sa udto uban sa mga sakop sa ordnance experts sa Central Command ug Special Weapons and Tactics (SWAT).

Apan base sa pamahayag sa mga eksperto dili mahimong didto pabuthon ang maong mga bomba sanglit duol kaayo kini sa highway ug adunay mga binuhing hayop ug mga linya sa kuryente sa duol niini. Ang Central Command misugyot nga adto na lang ibalhin sa Brgy. Biasong sa Balamban pabuthon ang mga vintage bombs apan lakip sa gikunsiderar alang sa kaluwasan sa magdala niini mao ang agianan.

Ang maong lungsod tangason ug dili maagian og sakyanan ang maong barangay hinungdan nga magkinahanglan sila og mga tawo nga maoy mopas-an niini sulod sa usa ka oras.

Ang maong lugar duha ka kilometro ang gilay-on gikan sa main highway ug mao nay lugar kaniadto nga gihimong labayanan o pabuthanan sa militar ug kapolisan sa ilang marekober nga mga bomba. Ang siyudad sa Sugbo mohimo og pormal nga request ngadto sa Philippine National Police aron magpatabang sa ilang police trainees ug maoy moalsa sa mga bomba paingon sa bukirang bahin sa Balamban.

Ang moalsa sa bomba kinahanglan magdala og basa nga panapton, magsul-ob og long sleeve ug protective mask tungod kay ang uban niini dunay nagtulo nga asido gikan sa pulbura.

Ang dapit diin makuykuyi ang maong mga bomba gisiksik pag-usab sa mga bomb experts aron pagsigurong wala nay nahibilin sa ilawom. Ang maong mga bomba adunay gibug-atong 150 pounds nga general purpose bombs nga ihagbong gikan sa mga abyon atol sa Ikaduhang Kalibutanong Gubat. - Sanden J. Anadia ug Rey Pasaporte/EIM (BANAT NEWS)