Upat ka tawo gipusil angol

CEBU, Philippines - Upat ang angol dihang gipusil sa usa ka pag-umangkon ang iyang uyoan didto sa Cuyos Compound sa barangay Tayud, lungsod sa Lilo-an kagahapon sa alas 2:00 pasado sa hapon.

Ang mga angol mao si Maximo Ceraspi, hingkod, Jeffrey Baylosis, usa ka factory worker, ang tindera og isda nga wala pa hiilhi sa pagsuwat ning balita, ug si Adonis Cuyos, ang tanan taga Liloan.

Sa report sa TV Patrol Central Visayas nasayran nga si Cuyos maoy suspetsadong miunay og pusil sa iyang uyoan nga si Ceraspi kinsa dugay na niining gikabangi.

Apan sa iyang pagpamusil gamit ang wala hisayring kalibre sa armas, wala damha nga makapagan kini og laing duha ka tawo nga mao si Baylosis ug ang lab-asira.

Nasayran nga si Ceraspi gipusil samtang nagpaihi sa iyang iro ug wala siya masayud nga miabot ang iyang pag-umangkon ug wala siya makabantay dihang gipusil siya nga nagtalikod niini.

Apan samtang naigo si Ceraspi sa buko-buko, naigo usab sa tiil si Baylosis, samtang sa hawak usab masabak ang lab-asira kinsa pulos diha sa palibot sa maong higayon.

Sa pakighinabi sa Banat News kang SPO2 Ernesto Pepito, desk officer sa Liloan Police Station nasayran nga dihang gisikop na sa kapolisan ang suspetsado misukol kini kay buot untang moikyas hinungdan nga gitirohan sa polis ang bagtak niini.

Samtang si PO3 Jason Gallo, sa kapolisan gihapon sa Liloan, mibutyag nga ang mga biktima ilang gihatod ngadto sa Vicente Sotto Memorial Medical Center sa dakbayan sa Sugbo.

Giklaro usab ni Gallo nga   sa pagsuwat ning balita wala pa nila mahuman ang imbistigasyon ug nagpadayon pa sila pagkuha og dugang   impormasyon   busa wala pa nila matino kun gawas sa tulo nga napusilan sa suspetsado wala na bay laing nabiktima niini.

Nasayran usab nga gipusil sa suspetsado ang iyang uyoan tungod sa personal nga bangi sulod na sa lima ka tuig. (WC)(BANAT NEWS)