Ginang gikulata ug giluba angol sa tulisan

CEBU, Philippines - Kritikal ang kahimtang sa 39-anyos nga ginang nga trabahante sa bakery human kini tabangi og kulata dayon gidunggab sa duha ka mga lalaki nga buot untang motulis kaniya didto sa Sitio Tabok Kamalig Bato, siyudad sa Danao niadtong Domingo sa alas 4:50 sa kaadlawon.

Ang biktima mao si Persilita Castro Perez, 39, minyo, nagpuyo sa maong lugar ug nagtrabaho sa Eyelet Bakery sa maong dakbayan.

Si PO1 Faron Avila, desk officer sa Danao City Police Station mibutyag sa Banat News nga ang biktima naglakaw sa karsada sa Taytay paingon na unta sa trabaho dihang kalit nga miabot ang duha ka wala hiilhing lalaki nga nagsakay og motorsiklo.

Nanaog dayon ang angkas niini dayong tion og kutsilyo ngadto sa biktima uban sa pagdeklarar nga tulis.

Unya gibunlot niini ang bag sa biktima apan gipugngan kini sa naulahi busa nanaog ang drayber sa motorsiklo ug maoy misumbag sa biktima ug sa pagkasarasay niini gipatiran pa gyud.

Apan wala gayud buhii sa biktima ang iyang bag nga maoy hinungdang gidunggab kini sa usa sa mga tulisan ug nasabak sa bukton nga maoy iyang gigamit sa pagpanagang.

Apan wala makontinto ang maong tulisan, giusban kini pagluba ug ang dughan na maoy nasabak ug sa pagkahagba niini sa yuta nagkupot gihapon sa iyang bag, ug gibiyaan sa mga tulisan 

Ang mga nakasaksi sa maong hitabo maoy mihatud dayon sa biktima ngadto sa Danao City District Hospital apan gibalhin kini sa tambalanan sa dakbayan sa Sugbo ubos sa talandugong kahimtang.

Nasayran sa kapolisan nga ang bag sa biktima  may sulod nga P 7 mil nga iyang tinigom hinungdan nga wala gyud niya ihatag ngadto sa mga tulisan.Padayong gipangita sa kapolisan ang maong mga tulisan. (/WC) (BANATNEWS)