Gikan sa kombira nadakin-as patay

CEBU, Philippines - Patay ang usa ka 47-anyos nga lalaking gikan nangombira sa ilang silingan nga bag-ong gikasal niadtong Domingo sa gabii diha sa sitio Tagaytay sa barangay Cambigong sa lungsod sa Samboan.

Ang biktima giila sa kapulisan nga mao si Damasco Catalina Mayola, 47, nga napalgang patay na pasado alas-7 sa gabii niadtong Domingo. Si Insp. Abel Laborte, hepe sa Samboan Police Station ug mga sakop niini daling miadto sa nahitaboan ug ilang nasayran nga ang biktima uban sa iyang mga higala nag-inom sa balay sa silingang si Ricardo Belocura kinsa gikasal niadtong Domingo.

Nahitabo ang pagkadakin-as sa biktima diha sa agianan gibanabanang 200 metros gikan sa balay ni Belocora ug gituohang nauna ang ulo niini ug napantok ug maoy nakaingon sa hinanali niining kamatayon.

Ang nahitabo sa biktima nakit-an sa mga bata nga diha sa duol niadtong higayona ug mao kini ang mitug-an sa kapulisan. (BANATNEWS)