Mo-resbak unta maoy napatay

CEBU, Philippines - Patay ang duha ka sakop sa Crips gang nga giingong tuyo untang mobawos sa ilang kaaway apan sila maoy naunhan ug gipamusil sa ilang gikaaway diha sa barangay Marigondon, dakbayan sa Lapulapu alas- 8 pasado ang takna sa miaging gabii.

Si SPO1 Allan Pantaleon sa Homicide Section sa kapolisan sa maong dakbayan miila sa mga namatay nga mao sila si Cesli Jade Cajes, 18, taga sitio Cambiohan ug Denmark Oyao Espinosa, 20, taga sitio Likoan sa barangay Marigondon sa maong dakbayan.

Matud pa ni Pantaleon nga samaron usab si Warren Espinosa nga nakabaton og daghang samad sa kalawasan ug kasamtangang giatiman sa mga doktor sa tambalanan sa dakbayan sa Sugbo.

Dugang pa niya nga diha sa sulod sa ilang panimalay si Warren paingon na untang mokaon dihang kalit gisaka sa mga namatay nga iyang gikaaway ug gitabangan siya sa pagdunggab.

Nangayo’g tabang si Warren ug miabot sa maong lugar ang wala pa mailhing armadong tawo nga mipusil sa nagdunggab kang Espinosa.

Matud pa ni Pantaleon nga nakabaton og samad pinusilan sa dughan si Cajes ug samad pinusilan usab sa ulo ang naangkon sa kauban niini nga si Denmark nga maoy hinungdan sa ilang hinanaling kamatayon.

Si Pantaleon miingon nga naghimo pa sila og dugang imbestigasyon sa maong insidente alang sa pag-ila sa mga tawo nga mitabang kang Waren ug namusil sa duha.

Dugang pa niya nga ilang gitino karon kun sakop ba usab sa gikaatbang nga gang si Warren ug kung unsay relasyon sa napatay nga si Espinosa ug si Warren. (/EIM)  (BANATNEWS)