Magsaysay misaway sa mga huwes

CEBU, Philippines - Diskontinto ang minoriya sa gihimo karon sa mga senador nga naghuwes   sa impeachment hearing batok ni Chief Justice Renato Corona.

Gibutyag ni Zambales Representative Mitos Magsaysay atol sa pagbisita dinhi sa Sugbo sa milabay’ng adlaw nga wala siya matagbaw sa gipakitang performance sa mga senator judges niining husay sa impeachmenrt ni Corona.

Matud ni Magsaysay atol sa press conference nga inay mintinahon sa mga senator judges ang ilang neutrality kon pagpatunga sa pagdumala sa impeachment hearing adunay pipila niini ang mipakita og tabang sa prosekusyon pagpangita og ebedensiya pinaagi sa pagsukit-sukit sa mga gipresentar nga mga witness.

Si Magsaysay nga kaalyado kaniadto sa milabay’ng administrasyon ni kanhi presidente Gloria Arroyo mihulagway nga hangtud karon wala pay lig-on ug solido nga mga ebedensiya nga na-presentar ang house prosecution niining nagpadayong impeachment hearing.

Gipakagamay usab ni Magsaysay ang giluwatang pamahayag sa prosecution  panel nga matud pa aduna sila’y ipresentar nga eksplosibong witness sa impeachment hearing karong adlawa.

Alang kaniya wala siya’y pagsupak sa pagpahigayon og impeachment trial batok sa chief justice basta ipatuman lang ang hustong mga lagda ug proseso.

Apan sa iyang napanid-an karon si Magsaysay miingon nga wala siya makauyon niini apil na ang uban niyang mga kaubanan sa minoriya tungod kay pabilin nilang gibarogan nga dinali- dali ug gimaniobra ang pagduso niining maong kiha sa Kongreso nga pirmado sa 188 ka kongresista.

Gani hugot ang pagtuo ni Magsaysay nga suportado kini sa Malacañang aron lang mapalagpot sa gahum ang kasamtangang chief justice.   - (BANAT NEWS)