CEBU, Philippines - Gipang-apod-apod na sa kagamhanan sa lalawigan sa Sugbo ang kaping 360 nga mga card sa pasiguro sa mga mag-uuma uban sa ilang kahayopan sa lungsod sa Argao.
Sumala pa ni Provincial Veterinarian Dr. Mary Rose Vincoy nga ang midawat sa maong insurance card ug insurance policy mao ang municipal agriculture officer sa maong lungsod nga mao si Adriano Rendon.
Si Vincoy miingon nga ang maong mga card pormal nga gitunol ngadto kang Rendon niadtong Biyernes.
Sigun pa ni Vincoy nga ang pagpasiguro sa kinabuhi sa mga mag-uuma ug sa ilang mga hayop maoy tipik sa programa ni Governor Gwendolyn Garcia sa paghatag og dugang benepisyo sa mga mag-uuma, mga mangingisda ug mga miyembro sa Bantay Dagat.
Sa iyang bahin, si Rendon nagpasalamat kang Gobernador Garcia tungod sa gihatag niining accident insurance sa mga mag-uuma nga sukad wala gyud matagamtami sa unang mga namunoan sa lalawigan.
Sa nasayran, kaliboan na ka mga mag-uuma uban sa ilang mga tanom ug mga hayop, ug mga mangingisda lakip ang ilang mga sakayan ug mga pukot ang gilukatan og insurance sa kagamhanan sa lalawigan aron kun may mahitabo kanila ug sa ilang mga panginabuhi, makakuwarta ang ilang mga pamilya.
Ang mi-insured kanila mao ang Philippine Crop Insurance Corporation ( PCIC) nga iya ra usab sa gobyerno. (BANAT NEWS)