Uyoan aksidente napusilan sa 7-anyos

CEBU, Philippines -  Nalandig sa tambalanan ang usa ka tinun-an sa kolehiyo human kini aksidenteng napusilan sa iyang pag-umangkon pasado alas-10 sa miaging gabii sa sitio Lupa Purok 3 barangay Camputhaw.

Ang biktima nailhan nga si John Kevin Pogado, 19, molupyo sa maong lugar aksidenteng napusilan sa iyang 7-anyos nga pag-umangkon.

Sa imbestigasyon sa kapolisan nasayran nga nahitabo ang aksidente atol nga nagtapok ang pamilya sa biktima ug sa maong bata kay nagplano sila sa ilang himuong salo-salo alang sa umaabot nga birthday sa biktima.

Matud pa nga ang maong .38 kalibreng armas gipanag-iya sa namatay na nilang uyoan nga nakit-an sa bata ilawom sa higdaanan sa uyoan ug gikuha kini kay abi og pusil-pusil kining duwaan.

Duna untay nakabantay sa gihimo sa bata sa maong armas sa dihang ilaha kining buyagon sa pagduwaduwa sa maong armas aksidenteng nakablitan sa bata ug kini mibuto ug naigo ang biktima sa walang bahin sa iyang lawas diin milapos ang bala sa iyang tiyan ngadto na sa bukton.

Tungod sa maong panghitabo daling gitabang ang biktima ug gidala sa Cebu Doctors Hospital.

Matud pa ni SPO1 Esmer Escultor, sa Cebu City Police Office Homicide Section nga ila nang gihatagan og spot report ang Gender And Development (GAD) sa barangay Camputhaw kalabot sa maong panghitabo.

Ang maong buhatan na maoy padesisyunon sa kapolisan kabahin sa hitabo sanglit bata ang aksidenteng nakaigo.

Gihulagway ni Escultor nga base sa ilang nakuha nga impormasyon nga wala kaayo maigo ang mga vital parts sa biktima ug luwas na sa peligro.

Nakuha sa crime scene ang maong armas, nga duna pay duha ka buhing bala sa kalibre .38 ug ang usa ka kabhang sa tambor niini. Gisusi pa sa kapolisan kung aduna ba kini papeles. (BANAT NEWS)