Combat drills sa PHL-US troops sa West PhilippinE Sea

CEBU, Philippines - Gikatakdang mohimo og joint-combat drills ang mga sundalong Filipino ug mga Amerkano sa usa sa mga oil rigs sa Pilipinas diha sa West Philippine Sea aron mapalig-on ang sistema niini pagpanalipod sa maong mga pasilidad tungatunga niining tensyon tali sa nasud ug sa China.

Sa report sa Associated Press, si Lt. Gen. Juancho Sabban, commander sa Western Command mibutyag nga ang maong combat drill gikatakdang himuon karong bulan sa Marso diha sa Malampaya Gas Project nga nahimutang sa lalawigan sa Palawan.

Matud pa ni Sabban dili angayang ikaalarma sa China ang maong combat drill sanglit kini himuon sulod sa teritoryo sa Pilipinas. Giingong sa maong kalihokan tun-an sa U.S. Marines ug Philippine Marines ang pagdepensa ug pagbawi sa maong pasilidad kun kini mailog sa mga kaaway.

Giklaro usab ni Sabban nga wala sa hunahuna sa mga utok sa maong pagbansaybansay nga ang China maoy gipangandaman sa duha ka nasud.

"We need this special training so we can defend our oil and gas platforms. We're doing it in an actual oil rig. We have many of these oil rigs we need to protect," matud pa ni Sabban. (BANATNEWS)