Puya gilabay sa sapa sa Capitol

CEBU, Philippines - Usa ka puya nga nagpangidaron og lima hangtod unom ka bulan napalgan sa usa ka gwardiya didto   sa sitio Bas barangay, Capitol Site ning dakabyan sa Sugbo sa miaging hapon.

Si Arnold Barangan, 22, usa ka gwardiya, ug molupyo sa maong lugar mitug-an sa kapolisan   nga nanglimpyo siya sa palibot sa iyang balay nga nahimutang daplin sa sapa sa maong higayon

Unya samtang nagtan-aw siya sa tubig sa sapa nakasiplat siya og butang nga murag batang gamay nga naanod sa tubig kuyog sa mga kagingking sa kawayan.

Sa iyang kaikag, gialihan niya kini aron nga dili madala sa sulog sa tubig.

Apan matud pa niya nga puwerting kurata niya dihang nakita niya nga tinuod gyung bata nga wala nay kinabuhi ang iyang nakita.

Busa gipahibawo dayon ni Barangan ang silingan nilang si Konsehal Kelly Quijada sa ilang barangay kinsa mao usab ang mitawag sa kapolisan. 

Si PO3 Geoffrey Gutual, sa Cebu City Police Office, Homicide Section mibutyag sa Banat News nga wala nila masuta kun babaye ba o lalaki ang maong puya tungod kay gamay pa kaayong gipugos og habwa gikan sa tiyan sa inahan.

Padayon usab nga gipanid-an sa taga barangay kun si kinsa sa ilang silingan ang malagmit nagpahilog sa maong bata.  (BANATNEWS)