P280mil danyos sa sunog sa Liloan

CEBU, Philippines - Mikabat og P280,000 ang kadaot sa mga kabtangang naugdaw human masunog ang usa ka balay   didto sa barangay Yati, lungsod sa Liloan sa ala 1:15 ang takna kagahapon sa hapon.

Si FO3 Rolando Capoy sa kabomberohan sa maong lungsod miila sa   tag-iya sa balay nga   nasunog nga si Julius ug Angelina Soco apan gipuy-an kini sa nag-abang nga sila si Janeth Robinson ug sa usa ka Indian national.

Matud pa ni FO3 Capoy nga wala na makatapon ngadto sa laing mga balay ang kayo kay nasanta dayon kini sa kabomberohan sa lungsod uban sa mga bombero sa sikbit nga lungsod sa Consolacion.

Dugang pa ni FO3 Capoy nga ang pikas bahin sa balay nga nasunog gihimong tindahan sa nag-abang niini

Matud pa niya nga ilang gipaubos sa second alarm ang maong sunog maoy hinungdan nakahatag dayon og ayuda ang mga bombero sa Consolacion.

Gitataw ni FO3 Capoy nga wala sila maglisod sa pagpawong sa kayo sanglit daplin man sa dalan ang nahimutangan sa balay nga nasunog.

Hinuon dili pa nila matataw kun diin dapit sa maong balay magsugod ang kayo ug ingon man ang hinungdan niini.

Hinuon walay kinabuhing napagan sa maong hitabo ug padayon pa ang imbistigasyon nga gilusad sa kabomberohan sa maong sunog.  - (BANAT NEWS)