CEBU, Philippines - Usa ka 59-anyos nga lalaki ang naghikog sa punoan sa sinagoylas didto sa barangay Mohon sa lungsod sa Sogod sa miaging adlaw.
Ang naghikog giila nga si Celso Comahig, 59, minyo, mag-uuma nga taga barangay Bagakay sa maong lungsod.
Sumala sa kapolisan nga ang nakakita sa patay’ng lawas ni Comahig mao ang tulo ka mga batan-ong lalaki nga nahasum-ok sa punoan sa sinagoylas nga iyang gihikogan kay nangita og kaka.
Ang gigamit ni Comahig sa paghikog mao ang pisi nga gihikot sa iyang liog ug gigaid ang pikas tumoy niini sa sanga sa sinagoylas.
Nagtuo ang kapolisan nga problemang personal ang nagtukmod kang Comahig sa paghikog.
Kini tungod kay giingong napriso ang iyang anak lalaki kay nanghagis sa ilang paryente ug ang panag-away nilang magtiayon nga giingong maoy hinungdang mikagiw ang iyang asawa nga si Bebe. Hinuon girekomendar sa kapolisan nga ipa-autopsy ang patay’ng lawas ni Comahig aron pagtino kun wala ba kini pasipad-i. (/WC) - (BANAT NEWS)