CEBU, Philippines - Kanhi sakop sa Philippine National Police (PNP) ug laing usa ka kauban niini ang nadakpan sa house detective sa usa ka inilang mall sa down town area niadtong Huwebes sa alas-12 pasado sa udto human nanguha og mga materyales alang sa balay.
Ang suspetsado nga gitanggong sa Waterfront police station giila sa kapulisan nga mao ang kanhi pulis nga si Jobie Libradilla Antipolo, 30, taga barangay Pansil sa lungsod sa Barili.
Samtang ang iyang kauban nailhan nga si Roy Abanilla Pansica,29, taga barangay Tabok sa dakbayan sa Mandaue.
Si SPO2 Darryl Alalim sa Waterfront police station nga nahinabi sa mga tigbalita nagkanayon nga gidala sa ilang buhatan ang duha sa house detective nga si Marlon Dennis Cabarrubias.
Sumala pa niya nga didto na sa entrance dapit gidakop sila si Antipolo ug Pansica nga nagdala sa bag nga gisudlan sa ilang mga kinuhang mga gamit sa balay sama sa mga locks nga mobalor tanan og P36,076.
Matud ni Alalim nga nakuhaan usab nila si Antipolo og usa ka .45 Armscor nga loaded og bala ang magazine niini ug wala kini napakitang papeles sa armas.
Nasayran sa kapulisan nga si Antipolo nadestino kaniadto sa Cebu Provincial Police Office (CPPO) nga nagranggo PO1 apan gibalhin siya ngadto sa Bohol Provincial Police Office (BPPO) apan nag-Absent Without Official Leave (AWOL).
Mag-atubang unya og kasong illegal possession of firearms and ammunitions si Antipolo samtang ang mopasaka og kasong pagpangawat kaniya ug ni Pansica ang tagdumala na sa maong mall.
Si Alalim dihang gisuwayan unta pagkuha sa Banat News sa iyang habig wala kini moatubang ug igo lang miingon nga ang iya nalang abogado maoy iyang gitugyanan sa iyang kaso. - (BANAT NEWS)