PhilHealth mirehistro'g kaping libo sa Mandaue

CEBU, Philippines - Ang Philippine Health Insurance Corporation (Philhealth), uban sa Party-list group nga LPG-MA ug kagamhanan sa dakbayan sa Mandaue milusad sa miaging adlaw sa usa ka health care program alang sa labing menos 1,000 ka kabus nga mga pamilya sa maong dakbayan.

Ubos sa maong programa si Rep. Arnel Ty sa Liquified Petroleum Gas Marketers’ Association (LPG-MA) migahin og pundo nga gikan sa iyang congressional Priority Development Assistance Fund aron mabayaran ang duha ka tuig nga premium sa maong benepisyaryo nga ilhon pinaagi sa buhatan ni Mayor Jonas Cortes. 

Ang paglusad gihimo pinaagi sa usa ka “handshaking ceremony” didto sa Waterfront Hotel Lahug, Cebu City nga gipangunahan mismo ni PhilHealth President Dr. Eduardo Banzon

Si Lito Torres sa PhilHealth miingon nga ilang napilian ang dakbayan sa Mandaue human sa makuting evaluation tali sa LPG-MA ug PhilHealth.

 Kini tungod kay matud pa niya ang Mandaue haum kaayo sa maong proyekto tungod sa   pagsaka pag-ayo sa iyang kalamboan sa milabay’ng unom ka tuig ubos sa administrasyon ni Mayor Jonas Cortes.

Ang pamahayag ni Torres gikonpirmar usab ni Banzon ug gani iyang gipasalig nga palapdan pa nila ang serbisyo sa PhilHealth ubos sa universal health coverage program.

Si Mayor Cortes sa iyang pagpasalamat sa PhilHealth ug LGP-MA sa pagpili sa Mandaue miingon nga ang maong programa dako kaayo og ikatabang sa mga kabus.

Kahihumdoman nga ang PhilHealth pinaagi sa ilang vice president sa Visayas William Chavez mihatag og ganti kang Mayor Cortes tungod sa pagparehistro niini og kaping 200,000 ka mga kabus nga pamilya nga naglakip sa mga drayber sa trisikad isip membro sa PhilHealth.   - (BANAT NEWS)