43 naluwas gikan sa human trafficking

CEBU, Philippines - Kapin sa 40 ka mga biktima, walo niini mga menor de edad ang naluwas sa mga sakop sa Task Force atol sa gipahigayong raid sa miaging gabii sa White Castle KTV Bar dalan Airport sa Barangay Pusok syudad sa Lapu-lapu.

Sa pakighinabi sa The Freeman ang igsuong pamantalaan sa Banat News ni Assistant City Prosecutor Atty. Liceria Rabellas, mibutyag kini nga 43 ka mga biktima sa human trafficking ang ilang nasalbar diin walo niini mga bata.

Matud pa ni Rabellas nga pipila na ka semanang ilang gipaubos sa surveillance ang maong bar hangtod nga nagpositibo kini. Gisugdan ang operasyon alas-9 sa gabii nga milanat hangtod na alas-4 sa kaadlawon kagahapon.

Butyag usab ni Rabellas nga ilang nasayran nga ang nahisgutang bar nanawat og mga menor de edad nga mga trabahante ug napamatud-an nila kini human sa dental examination nga ilang gihimo.

Gi-turnover na sa Department of Social Welfare and Development (DSWD) ang mga menor de edad.

Nasayran nga ang mga sakop sa International Justice Mission (IJM), Department of Justice (DOJ) ug kapolisan maoy nagtinabangay sa maong operasyon.

Kasong kalapasan sa Republic Act of 9208 o Anti-Trafficking in Persons Act of 2003 sa Lapu-lapu City Prosecutors Office ang atubangon sa tag-iya niini. (BANATNEWS)