Usa sikop sa buybust

CEBU, Philippines - Nabulabog ang gipasanginlang drug pushers nga naglihok sa Purok 1, Brgy. Bangbang sa lungsod sa Cordova human sa nahitabong operasyon sa kapolisan sa milabay’ng gabii ug miresulta sa pagkasikop sa usa.

Ang nasikop mao si Antonio Macar, 27, residente sa maong dapit samtang ang nakaeskapo mao si Hernando Villamor nga residente usab sa maong dapit.

Mga alas 6:00 sa milabay’ng gabii gilusad sa kapolisan ang buybust operation pinangulohan ni Chief Insp. Noli Cernio human sila makadawat og impormasyon kabahin sa ilegal nga kalihukan sa grupo diha sa maong lugar.

Nakuha kang Macar ang duha ka gagmay’ng pakete sa gituhoang shabu ug mga kagamitan sa pagsuyop niini.

Samtang si Villamor maoy nakadawat sa buybust money nga P200 dali kini nga nakasibat human mamatikding mga awtoridad ang nakapalit kanila.

Matud pa ni Cernio dugay na nilang giobserbahan ang operasyon ni Villamor ug Macar hinungdan sa gihimong buybust operation.

Kasong kalapasan sa Art. II Sec. 5 ug 11 sa RA 9165 ang ipasaka batok ni Macar ug Villamor bisan pa kung kini gawasnon sa mata sa balaod. (BANATNEWS)