Naeskapohang jailguard taktakon

CEBU, Philippines - Girekomendar nga ipataktak sa serbisyo isip jailguard nga gi-eskapohan og piniriso sa miaging semana didto sa barangay Lamintak Sur sa lungsod sa Medellin.

Si Algier Comendador, acting Provincial Warden sa Cebu Provincial Detention and Rehabilitation Center (CPDRC) nga nahinabi sa Banat News sa iyang buhatan kagahapon sa buntag mibutyag nga iya nang giduso sa Committee on Discipline sa buhatan ni Gob. Gwendolyn Garcia ang iyang rekomendasyon nga ipa-dismiss sa serbisyo si SJO1 Felix Betasalo.

Kahinumduman niadtong petsa 11 niining buwana, si Betasalo maoy escort ni Kim Invento nga dunay hearing sa kasong murder diha sa korte sa dakbayan sa Bogo ug pagkahuman mihangyo kini kang Betasalo nga mopauli una sa ilang balay sa Lamintak Sur.

Nagsakay lang sila og PUJ paingon sa Lamintak apan pag-abot sa balay ni Invento nagpasumangil kining mopalit og softdrinks ug gihapit pa niini og hapyod ang manok hiniktan.

Si Betasalo niadtong higayona nangihi pipila lang ka metros ang distansya sa balay apan sa iyang paglingi mikaratil na og dagan si Invento paingon sa katubhan ug wala na madakpi og balik.

Matud ni Comendador niadtong Enero 13 nanawag kaniya ang uyoan ni Invento nga si Emilio Villegas nga kapitan sa naasoy’ng barangay ug nagpahibalo nga motahan ang iyang pag-umangkon hinungdan nga iya kining gipakuha didto sa Medellin .

Mipasabot si Comendador wala niya gisagol karun sa ubang piniriso si Invento diha sa CPDRC ug iyang gibutang sa isolation cell.

Samtang neglect of duty ang nahimong kalapasan ni Betasalo hinungdan nga iyaha kining girekomendar nga ipa-dismiss sa serbisyo ngadto sa Committee on Discipline sa buhatan sa gobernador.

Gihulagway niya nga ‘side tripping’ ang gihimo ni Betasalo ug dako kini og silot.

Subling gipahinumdoman ni Comendador ang mga jail guards ang patakaran nga “from jail to court, from court to jail,” ra gyud.

“Si Betasalo 27 na ka tuig nga nagserbisyo ug nasayod na siya ana,” sumala pang Comendador, kinsa nidugang nga bisan sa gidugayon sa serbisyo ni Betasalo dili kini makatabang kaniya aron makalingkawas niining iyang kasong giatubang.

Gani gidugang ni Comendador nga kun duna man gani mangasakit nga piniriso ug kinahanglan nilang dad-on sa doktor, mohimo paman sila og letter request ngadto sa korte.

Si Comendador mitataw nga dunay pirmahan ang mga jailguards nga liable sila kun maeskapohan og piniriso.

Matud niya nga nalangan ang iyang gihimong imbestigasyon tungod kay nasangit sila sa Sinulog ug niadto lang Miyerkules niya naduso sa buhatan sa gobernadora. (/EIM) (BANATNEWS)