Lider sa mga tulisan namatay

CEBU, Philippines - Namatay sulod sa tambalanan kagahapon sa buntag ang lider sa Balbero Robbery Group (BRG) nga napusilan sa mga sakop sa Provincial Intelligence Branch (PIB) niadtong Martes sa hapon duol sa inilang mall sa barangay Tabunok sa dakbayan sa Talisay.

Tungod sa kamatayon niini, dili na makab-ot ang hustisya sa mga nabiktima, apan hinuon nadakpan sa kapulisan ang laing tulo ka mga sakop niini.

 Si James Harold Balbero, giilang lider sa Balbero Robbery Group nga nagbase dinhi sa dakbayan ug Metro Cebu, didto mamatay sa Vicente Sotto Memorial Medical Center (VSMMC) kagahapon sa alas 1:00 sa buntag tungod sa cardiac arrest ug ang pagkahurot sa iyang dugo gumikan sa samad pinusilan sa iyang lawas. Usa sa mga doktor nga miatiman ni Balbero kinsa mihangyong dili magpaila sa The Freeman igsuong mantalaan sa Banat News mitug-an nga milampos sila sa operasyon ni Balbero sa alas 9:00 na sa gabii niadtong Martes.

Matud niya nga usa sa mga dakong ugat sa paa ni Balbero nga maoy naigo sa bala naputol hinungdan nga ila kining gisumpay og balik.   Apan nahutdan og dugo si Balbero ug naglisud usab ang mga doktor sa pagpangita og klase sa dugo nga AB type tungod sa kanihit niini nga maoy klase sa dugo sa biktima. “Ever since nihit kaayo ni nga type sa dugo and in fact there is no blood available sa blood bank, so type O among gibutang,” matud pa sa doktor. Ang doktor midungag nga dako ilang pagtuo nga maka –survive pa unta si Balbero tungod sa iyang vital signs nga normal human sa ilang operasyon niini.

 Didto na atakiha sa cardiac arrest si Balbero sulod sa recovery room sa maong tambalanan.

Si Balbero napusilan atol   sa pakigpinusilay niini batok sa kapolisan niadtong Martes sa hapon didto sa Barangay Tabunok, sa dakbayan sa Talisay.

 Ang mga operatiba sa PIB miangkon nga armado sa .45 kalibre nga pistola ug hand grenade si Balbero.

Siya maoy gitumbok sa kapulisan nga responsabli sa pagpusil patay kang Juan Carlos Villordon kinsa misuway og laban sa iyang hinigugma nga gitulis uban sa laing duha nila ka mga kauban niadtong Domingo sa kaadlawon didto sa VUDU restobar sa barangay Kasambagan, siyudad sa Sugbo

Positibong giila si Balbero ni Aimee Sembrando, hinigugma ni Vollordon. Ang ngalan ni Balbero milutaw human madakpi ang iyang tulo ka mga kauban atol sa hiniusang operasyon sa mga sakop sa Intelligence Unit sa Cebu Provincial Police Office (CPPO), Cebu City Police Office (CCPO) ug Mandaue City Police Office (MCPO).

 Unang nadakpan niadtong Martes sa buntag mao sila si Ramil Batican, Ronald Dindin ug Marlon Hermoso, pulos taga dakbayan sa Danao ug si Justin Flores nga taga   Barangay Pasil, dakbayan sa Sugbo. Ang pagkasikop nila nahimo dihang unang nadakpan si Marlon Andrino, 34, nga taga Barangay Magay, lungsod sa Compostela nga nag-atubang usab og daghang kaso sa pagpanulis ug carnapping.

Si Andrino nadakpan niadtong Enero 12 sa Mandaue City Police Office human tulisa niini si Shiela May Antolihao.

Apan ang iyang kaubang si Junie Caraat napusilan patay sa kapolisan. Sila si Batican, Dindin ug Hermoso maoy responsabli sa mga tulis sa highway ug carnappings sa Metro Cebu areas ilabi na dinhi sa dakbayan sa Sugbo.   - BANAT NEWS