P2m nga alahas gilabay

CEBU, Philippines - CorrespondentAng mga mahalong alahas nga gibana-banang nagkantidad og P2 milyones nga nakoykoyan sa mga basurero sa dumping area sa barangay Umapad sa dakbayan sa Mandaue sa miaging adlaw, anaa na sa kapolisan apan kuwang na.

Kini tungiod kay human bahin-bahina sa mga basurero, gibaligya dayon ang usa niini, samtang ang laing alahas giprenda ngadto sa usa ka inilang pawnshop.

Ang team sa Investigation Detection and Management Bureau (IDMB) sa Mandaue City Police Office (MCPO) nga gipangulohan ni Insp. Ramil Morpos maoy mihimo dayon sa imbistigasyon human madawat niini ang taho gikan kang Cabancalan Barangay Kapitan Corregedor Cosedo kalabot sa mga alahas nga nakoykoyan sa basurero sa nahisgotang dapit.

Ang maong mga alahas giingong gikan sa usa ka   dump truck sa barangay Cabancalan nga gimaneho sa drayber nga si Marwen Italya, uban sa mga truck boy nga sila si Oscar Oplado ug Joseph Garcia.

Matud pa ni Insp. Morpos nga iyang gipatawag sila si Rodrigo Corta, 55, taga sitio Tambis sa nahisgotang barangay, Antonio Cuizon, 40, ug Eda Montecalvo, 41, pulos nagpuyo sa maong dapit.

Nasayran nga si Corta mitugyan ngadto sa kapolisan sa   usa ka gold bracelet nga adunay pendant, duha ka singsing nga bulawan, usa ka gold bracelet nga adunay bato ug usa ka resibo sa Henry Lhuillier Pawnshop nga nagdala sa kantidad nga P127,000 nga giprenda sa gisugo ni Corta nga si Bernardo Baylon.

Gitugyan ni Corta ang salapi nga P36,500 nga giingon niini nga tipik sa kantidad sa pagprenda sa maong alahas sanglit nagasto na niini ang dakong kantidad sa maong salapi sama sa pagpamalit og mga dapat sa balay niya.

Samtang ang ubang kantidad gihatag usab ni Corta isip pahalipay ngadto sa iyang mga silingan.

Giangkon usab ni Eda Montecalvo nga ang usa ka gold necklace nga didto kaniya iyang gibaligya ngadto sa mamalitay og alahas nga nahisuroy sa ilang dapit sa kantidad nga P15,000.

Si Insp. Morpos miingon nga usa sa mga alahas nga napalgan, ilang nasuta nga class ring sa usa ka unibersidad sa dakbayan sa Sugbo nga nagdala sa ngalang Vicente Tan.

Matud pa ni Morpos nga kasamtangan nilang himoan og pakisusi ang maong ngalan sa barangay Cabancalan alang sa pag-ila kun mao ba usab kini ang Vicente Tan nga nanag-iya og patigayon sa maong dapit.

Dugang pa niya nga ilang gisusi ang maong ngalan sa barangay Cabancalan ug ilang nasuta nga ang basura diin napalgan ang mga alahas gikan sa maong lugar.  - BANAT NEWS