Molupyo sa sapa pabalhinon

CEBU, Philippines - Giisip nga usa ka dakong hagit alang kang Talisay City Administrator Richel Bacaltos ang awhag ni Kongresista Eduardo Gullas sa unang distrito sa lalawigan sa Sugbo nga pabalhinon ang mga nanimuyo sa daplin sa kasapaan sa maong dakbayan.

Kini tungod kay sumala pa ni Gullas atol sa pagpamulong niya sa kasaulogan sa Charter Day sa Talisay niadtong Enero 12, 2012 nga nabalaka sa dakong kadaot unya sa kinabuhi ug kabtangan sa mga nanimuyo sa daplin sa kasapaan kun may trahedyang moabot sa palibot.

Busa alang sa kongresista nga mas maayong pabalhinon na karon pang daan ang maong mga molupyo aron nga masalbar sila gikan unya sa mga dagkong baha, lunop ug linog nga kalagmitang moabot tungod sa kausaban sa klima sa panahon karon.

Gumikan sa maong awhag   si Bacaltos isip administrador sa siyudad milihok dayon ug miawhag og panagtagbo sa mga dagkong opisyal sa kagamhanan sa dakbayan aron tukion ang maong isyu.

Samtang sa bahin sa awhag ni Kongresista Gullas   nga suportahan ang mga vendor sa merkado sa Lagtang pinaagi sa pagpatak-op sa Nacario Trade Center (NTC) sa Tabunok, si Bacaltos nagkanayon nga gipaabot nalang nila ang order sa korte kalabot niini.

Matud pa niya nga gihatagan pa sa korte ang tag-iya sa NTC nga makatunol sa tubag niini sa mando nga manira sila sa tindahan.

Hinuon matud pa ni Bacaltos nga di makasupak ang NTC sa maong mando tungod sa daghang kalapasan nga nahimo niini.

Pipila niini mao ang pagka-walay imbornal sa maong tindahan sa mga Nacario ug ang ka-walay parkinganan   sa mga sakyanan niini.

Sa bahin sa kampo sa oposisyon sama kang Konsehal Danny Caballero, kini nagkanayon   nga alang kaniya kining gihimo karon sa administrasyon sa Talisay sama ra sa usa ka tawo nga nangita og sulbad sa iyang problema apan nangita og laing problema. Kini tungod kay alang kaniya bisan kun nakalapas ang NTC sa mga reglamento sa balaod, giisip niyang walay sala ang tag-iya sa NTC.  - BANAT NEWS