Vendor og kandila mihangyo ni Rama

CEBU, Philippines - Ang mga manindahay og kandila sa sidewalk sa simbahan sa Sto. Niño mihangyo kang Mayor Michael Rama nga hatagan unta sila og higayong makapanginabuhi sa maong lugar hangtod sa ilang kamatayon.

Ang maong hangyo nila ni Estrella Quiño, 60, taga lungsod sa Tabogon, Lucila Villatiu, 62, nga taga Boljoon, Adelaida Aguilar, 60, nga taga Tabogon, ug Remedios Vega, 47, taga Boljoon, gipaagi dinhi sa Banat News gumikan sa giingong wala nila igkita ang   mayor dihang miadto sila sa buhatan niini.

Si Quiño kansang nawong mihuboy ug milagom uban sa mga bun-og sa nagkalainlaing bahin sa iyang lawas mitibi didto sa buhatan sa Banat News  gumikan sa giingon niyang pagkulata kaniya sa ginganlan og Cristie (apilyedo wa nila hisayri),   vendor usab og kandila sa sulod sa compound sa Sto. Niño niadtong Lunes sa buntag, liwas sa Sinulog.

Uban sa iyang mga saksi nga sila si Villatiu, Aguilar, ug Vega gibutyag ni Quino nga human siya sumbaga sa nawong ug nagkalainlaing bahin sa lawas, gidakdakan pa siya sa baril nga patud-anan   sa talo sa kandila sa sidewalk sa Sto. Niño.

Gibutyag ni Quino, nga sukad pa sa tuig l983 diha na siya sa maong puwesto ug gani gitugotan na siya sa mga tinugyanan sa SPEED kinsa anluoy sa iyang kahimtang.

Gibutyag sa maong mga vendor nga gibantayan nila ang ilang puwesto sulod sa 24 oras, adlaw ug gabii, magbagyo ug mag-ayo ang panahon aron dili sila ilogan sa maong puwesto.Apan matud pa ni Quino nga si Cristie kinsa taga Minglanilla nga bag-o lang nahimong vendor diha sa maong lugar maoy mipapahawa kanila sa ilang puwesto busa gikasakit kaayo nila ang nahitabo kanila.

Matud pa sa tulo nga ang pagpamaligya og kandila maoy ilang gibuhi sa ilang pamilya didto sa probinsiya diin gawas sa halin sa kandila, makakuwarta usab sila og ginagmay sa halin nila sa talo nga matigom nila sa ilang baril.

Kini tungod kay kun makatigom sila og lima ka kilo nga talo matag adlaw, bahin-bahinon nilang upat   ug ibaligya usab nila kini sa tag P35 matag kilo ug may ika-luto na sila og bugas aron sila makakaon.

Gumikan kay bisan ang pari sa Sto. Niño nga si Padre Jun Saladaga wala man magtagad sa ilang kahimtang, midangop sila sa Banat News sa pamasin nga kining ilang kasubo makaabot sa dunggan ni Mayor Rama ug mohimo kini og lakang aron pagsalbar sa ilang  panginabuhi diha sa maong lugar pinaagi sa pagpamaligya og kandila.

Hinuon ang mga sidewalk vendor sa sulod sa Sto. Niño mibutyag nga sila ra ang gitugotan sa simbahan sa pagpamaligya og kandila, samtang ang taga gawas sama sa grupo ni Quino, kontrolado sa SPEED. - Lemuel Maglinte/Wen Celen (BANAT NEWS)