Magtiayong milabay og patay nga bata gipangita

CEBU, Philippines - Magtiayon milabay sa gituohang ilang anak nga gisulod sa usa ka plastik diha sa barangay Suba Basbas sa dakbayan sa Lapulapu kagahapon sa kaadlawon.

Matud pa ni PO2 Franklin Bolaquia sa Homicide Section sa pakighinabi sa Banat News ilaha karong gisubay si kinsa ang usa ka lalaki ug babayeng luwan sa motorsiklo nga nakit-an sa mga tawong adunay gilabay nga plastic diha sa taytayan sa maong barangay.

Sumala pa ni Bolaquia usa ka Maximiano Bensi nga residente sa maong dapit uban sa mga higala ang nag-inom dili layo sa maong taytayan ug nakakita sa pag-agi sa maong duha ka tawong nagmotor pasado alas-12 kagahapon sa kaadlawon nga ang direksyon padulong sa lungsod sa Cordova.

Apan pag-abot sa taytayan mihunong ang motor ug mikanaog ang babaye ug duna kini gilabay ilawom sa maong taytayan ug pagkahuman mibiya sa maong lugar.

Nakuryoso si Bensi maong gisusi niya ang gilabay nga plastik ug dihang iyang gitan-aw ang sulod niini usa diay kini ka batang lalaki nga wala nay kinabuhi.

Ang maong puya dali nilang gidala sa tambalanan apan gideklarar kini nga patay na. Sa pagbanabana sa mga mananambal upat ngadto sa lima na kini ka bulan. Kini gilubong nalang sa sam-ang katoliko sa dakbayan sa Lapulapu.  - BANAT NEWS