Ex-con gibirahan patay

CEBU, Philippines - Patay diha-diha ang usa ka ‘ex-convict’ human kini pusila sa duha ka wala mailhing mga kriminal kagahapon sa alas 2:30 sa hapon diha sa dalan S. Osmeña ug eskina sa dalan R. Palma, barangay San Roque, dakbayan sa Sugbo.

Ang biktima mao si Joselito Ramirez, residente sa maong dapit apan lumad nga taga barangay Kawit, lungsod sa Medellin.

Si Ramirez nakaangkon og usa ka samad pinusilan sa tuong bahin sa nawong, tuong bahin sa lawas ug dughan nga maoy hinungdan sa iyang kamatayon.

Sa imbestigasyon ni PO3 Victor Ayuman sa Cebu City Police Office Homicide Section nasayran nga si Ramirez diha daplin sa karsada nagdagkot og sigarilyo dihang miabot ang duha ka wala mailhing mga lalaking sakay og usa ka motorsiklo ug mipusil sa biktima.

Human og pamusil ang mga kriminal daling misibat paingon ngadto sa North Reclamation Area.

Si Ayuman nagkanayon nga gituohan nilang ang biktima nakaila sa mga kriminal tungod kay miisa kini sa iyang duha ka mga kamot dihang miabot ang maong mga lalaki.

Gidudahan sa kapolisan nga dunay kalambigitan sa ginadiling drugas ang maong hitabo.

Usa sa mga silingan ni Ramirez diha sa dapit kinsa nagdumili sa pagpabutyag sa pangalan nagkanayon nga drug addict ug napriso na kaniadto tungod sa paghupot og ginadiling drugas ang biktima.

Ang kapolisan naka-recover gikan sa pitaka sa biktima og “promulgation” sa korte nga giluwatan ni Regional Trial Court (RTC) Judge Enriqueta Belarmino sa Branch 57 niadtong Agosto 5, 2011.

Ang kapolisan nagpahigayon og follow-up operation sa maong hitabo. - Brenda D. Batuto ug Ryan Christopher J. Sorote sa The Freeman/EIM (BANAT NEWS)