Robbery Group Napuhag

CEBU, Philippines - Lider sa gidudahang tulisan samdan human nakigpinusilay sa mga sakop sa Provincial Intelligence Branch (PIB) kagahapon sa hapon duol sa usa ka inilang mall diha sa barangay Tabunok sa dakbayan sa Talisay.

Si Harold James Balbero lumad nga taga Danao City, apan kasamtangan nag-abang og kwarto diha sa barangay Tabunok ang anaa karun sa Vicente Sotto Memorial Medical Center human nahiagom og duha ka samad pinusilan sa duha niini ka paa.

Si Sr. Supt. Melvin Ramon Buenafe, hepe sa Cebu City Police Office (CCPO) nagkanayon sa press conference kagahapon sa hapon diha sa media center sa Police Regional Office-7, human gipusil sa mga tulisan si Juan Carlos Villordon, 27, taga Lipata, Minglanilla niadtong Domingo sa kaadlawon diha sa usa ka restobar nakig-alayon dayon sila sa Mandaue City Police Office (MCPO).

Diha sa MCPO nakakuha og mga hulagway sa mga notadong tulisan sa Mandaue ang CCPO ug usa niini si Balbero kinsa gitumbok sa uyab ni Villordon sa haya sa naulahi nga maoy usa sa mitulis kanila.

Kagahapon sa buntag miumol dayon og joint operation ang mga sakop sa Intelligence sa Mandaue City Police Office (MCPO), Cebu City Police Office (CCPO) Cebu Provincial Police Office (CPPO) ug nihimo sila og follow-up didto sa dakbayan sa Danao.

Girombo sa kapulisan ang hide-out sa maong grupo diha sa barangay Sabang ug una nilang nadakpan sila si Marlon Labrador Hermoso kinsa kanhi binilanggo sa Cebu Provincial Detention and Rehabilitation Center (CPDRC) tungod sa kasong robbery, Ramil Edra Batican ug Ronaldo Casas Dindin.

Nakuhaan sila og tagsa-tagsa ka armas, mga nagkalain-laing klase sa pitaka, I.D, usa ka Honda wave kolor pula, mga bags nga gituohang iya sa ilang biktima sa Danao ug mga kasikbit nga lungsod sa Carmen, Compostela ug Liloan.

Matud ni Sr. Supt. Patrocinio Comendador sa CPPO human sa nahitabong tulis niadtong Enero 12 diha sa dakbayan sa Mandaue diin usa ka April Desierto nga gipatay sa mga tulisan, nakig-alayon dayon sila sa kapulisan sa dakbayan sa Mandaue ug dakbayan sa Sugbu.

Si Buenafe mibutyag nga usa sa mga dinakpan nga si Justin Flores nga nalambigit sa pagpangarnap og motor ug may warrant of arrest niadtong Domingo mibutyag sa pangalan ni Balbero nga maoy lider sa grupong Balbero Robbery Group nga mangigoay sa Metro Cebu.

Si Flores maoy yawe nga nadakpan sila si Hermoso, Batican ug Dindin, apan hugtanong mihimakak nga apil siya sa maong grupo.

Si Chief Supt. Marcelo Garbo hepe sa kapulisan dinhi sa Central Visayas midayeg sa kooperasyon sa nagkadaiyang police units sa Sugbu nga nasulbad dayon ang nagsunod nga mga kaso sa pagpanulis sa nakalabay’ng semana.

Si Garbo midugang nga dakong hulga sa katawhan sa maong mga lungsod ang grupo ni Balbero tungod kay pulos mga armado.  - BANAT NEWS