CEBU, Philippines - Nasikop sa buy bust operation ug nagtingkagol sa karsel ang gitumbok nga notadong tigpayuhot og gidiling drugas sa pantalan sa barangay Taloot lungsod sa Argao niadtong Lunes sa alas 10:15 sa gabii.
Ang nasikop mao si Rondie Salardi Belen, 29, nagpuyo sa sitio Tongo sa barangay Taloot ug nakuhaan kini og siyam ka mga sachet nga dunay gituohang sulod nga shabu apil na ang P300 nga buybust money.
Matud ni PO2 Marvin Chin sa Argao Police Station dihang nahinabi sa Banat News nakadawat sila og report bahin sa pagpamaligya og gidiling drugas ni Belen sa maong pantalan
Ang kapulisan pinangulohan sa hepe niini Insp. Alejandro Batobalonos milusad og buybust operation nga miresulta sa pagkasikop niini human motunol og ‘shabu’ ngadto sa poseur buyer.
Sa pagrekisa kang Belen dugang walo ka paketeng dunay sulod gihapon nga gituohang shabu diha sa iyang bulsa ang nakuha.
Pipila na ka semana nga gipanid-an ang suspek tungod sa pagpamaligya niini og ginadiling drugas sa maong lugar, kasong kalapasan sa Akta Republika 9165 ang atubangon ni Belen. (BANAT NEWS)