Tabang sa DPWH sa local road projects giduso

CEBU, Philippines - Milarga sa kaulohan kagahapon si Cebu City Mayor Michael Rama aron tukion sa mga opisyales sa Regional Development Council ang ilang hangyo sa Department of Public Works and Highways nga sagupon ang mga polisiyang unahon ang pagpaayo ug paghimo sa kadalanan.

Nasayran nga limitado lang ngadto sa mga national roads ang kasamtangang pamaagi sa DPWH sa pag-paayo sa mga kadalanan, taytayan ug flood control system.

Matud pa sa gigama nga report ni Rama nga iyang nasayran nga wala gyuy gigahin ang DPWH alang sa mga local roads.

Nagkanayon ang mayor nga angayan hatagan og pagtagad ang mga kadalanan nga nangaguba tungod kay kuwang og pundo ang ubang local government units.

Gisaysay sa mayor nga kasagaran sa mga dalan nga tabanganan kaayo nahimutang sa Region 8.

Kung maayo ang mga kadalanan, makapaambit usab kini sa pagpauswag sa turismo sa usa ka local government unit. (BANAT NEWS)