Bus nalimbuwad 28 angol

CEBU, Philippines - Usa ka bus ang nalimbuwad ug miangol og 28 ka pasahero niini kagahapon sa buntag diha sa barangay Pangdan, sa Naga City. Ang 28 ka pasahero sa 40 ka mga tawong sakay sa JS Calvo bus liner ang gidala sa South General Hospital ug gibalhin sa Vicente Sotto Memorial Medical Center sa Cebu City tungod sa nagkadaiyang kadaot nga nahiaguman.

Ang drayber sa maong bus nga si George Compasion kinsa natanggong na sa karsel giingong mi-overtake sa usa ka bus apan tungod sa kakusog sa dagan niini pagliko nalambayog ang bus ug natumba.

Giila sa kapolisan ang mga naangol mao sila si Eldory Paran, 25; Roland Vergara, 44; Alberto Alferez, 48; Enrico Villaber, 50; Clifford Baclaan, 18, ug Christian Niel Baclaan, 18, pulos taga dakbayan sa Toledo.

Samtang naangol usab sila si Tomas Cantiveros, 42; Jilson Canillo, 23; Jolan Hontico, 18, ug Jerry Cabaña, 26; Rolando Manayo, 44; Allan Lapasigue, 27; Hadji Manalo, 24; Reynaldo Malinao, 39. Lakip sa naangol sila si Antonio Agustin, 28 ug Mario Sedavia, 45; Guillerma Repdos, 38; Josephine Alcueza, 31, ug Juanito Ragasajo, 54;

Anthony Quijano, 24; Anecito Bastatas Jr. 26; Rita Cantalejo, 39; Rolando Galvez, 42, ug Ronald Algalvez.

Naangol sad sila si Vincent Vargas, 44; Whoemalaide Vargas, 4, ug Sergio Gelaria, 44, kinsa pulos gidala sa tambalanan.

Si PO3 Francisco Codiñera, Naga City traffic investigator miingon nga paspas ang dagan ni Compasion ug pag-abot sa kurbadahong bahin sa maong dalan nawad-an kini og kontrol ug nalimbuwad.

Sa pakighinabi kang Compasion kusganon kining mihimakak nga mi “overtake” siya ug gipasangil niya nga dangog ang dalan maong wala niya mapugngi ang manobela.

“Wa man pud ko kainom, okay akong tulog pero disgrasya gyud to,” pag-insister pa ni Compasion kinsa midugang nga sa onse ka tuig niyang pagmaneho mao pa kadto ang unang aksidente nga iyang nasugamakan.

Si Supt. Eduardo Saavedra, officer-in-charge sa Naga City Police Station miingon nga kasong reckless imprudence resulting in multiple physical injuries ang atubangon ni Compasion. (BANATNEWS)