CEBU, Philippines - Naugdaw sulod sa 45 ka minutos ang gibanabanang 200 ka balay sa dakong sunog nga miigo sa sitio San Lorenzo Ruiz, barangay Jagobiao, dakbayan sa Mandaue nga nagsugod alas 11:37 ang takna kagahapon sa buntag.
Si SFO1 Arnold Lao, imbestigador sa Bureau of Fire and Protection (BFP) sa dakbayan sa Mandaue nga nahinabi sa Banat News miingon nga nagsugod ang kalayo sa kisame sa ikaduhang andana sa panimalay nga gipanag-iya sa usa ka Laurencia Dumalagan.
Dugang pa ni Lao nga pulos ginama sa light materials ang maong panimalay hinungdan nga dali kaayong mikaylap ang kalayo sa kinatibuk-ang bahin niini ug sa mga kasikbit nga kabalayan nga ginama usab sa light materials.
Si Mandaue City Fire Marshall Rogelio Bongabong mipaubos gilayon sa Task Force Bravo sa maong sunog nga girespondehan sa kabomberohan sa Sugbo nga naglakip sa dakbayan sa Lapulapu, dakbayan sa Sugbo, dakbayan sa Talisay, Consolacion ug Liloan.
Si Lao miingon nga bisan ang mga fire brigades sa mga pribadong kompaniya mitabang sa pagpawong sa sunog.
Giangkon niya nga naglisod sa pagsulod ilang fire trucks tungod kay gamay ang dalan hinungdan nga nadugay sila sa pagkontrol sa kalayo.
“Ang kagamay sa dalan sa lugar mao gyuy nakaingon nga naglisod ang among fire trucks sa pag-penetrate,” pamahayag pa ni Lao.
Dugang pa ni Lao nga sa pasiunang pagbanabana, mokabat sa P2 milyones ang gibiling danyos sa sunog wala hinuoy nasakitan sa maong hitabo.
Wala pa usab nila masubay ang sinugdanan niini ug kini maoy nag-unang subayon sa ilang imbestigasyon.
Ang City Social Welfare sa Mandaue nga gipangulohan ni Violita Cabada mihimo na og koordinasyon ngadto sa mga opisyales sa nahisgutang barangay aron mapahiluna ug mapakaon ang mga nasunogan.(/EIM) (BANATNEWS)