Usa patay sa rambol

CEBU, Philippines - Usa ang patay sa nahitabong rambol sa duha ka grupo sa mga batan-on nga nag-inom sa isla sa Kinatarkan sa lungsod sa Sta. Fe niadtong Sabado sa alas 3:00 sa kaadlawon.   Ang patay nang nadangat sa tambalanan mao si Larry Escalrica Arsolon Jr., 19, molupyo sa maong lugar samtang giila ang nakadunggab kaniya mao si Lomberto Villacarlos, nagpuyo gihapon sa susamang dapit.

Matud ni PO1 Isabelo Carasina sa Sta. Fe Police Station dihang nahinabi sa Banat News nag-inom ang duha ka grupo sa usa ka imnanan sa maong lugar dihang adunay namato sa pundok sa suspek.

Tungod niini nagkakomprontase ang duha ka pundok nga misangpot sa karambola ug tungatunga sa kagubot giingong mibunot og kutsilyo ang suspek ug gidunggab ang biktima tumong sa dughan.

Pagkahuman niini kusog kaayong midagan ang suspek palayo sa lugar samtang ang biktima gidali og karga og pumpboat ug gidala sa Daanbantayan District Hospital sa lungsod sa Daanbantayan apan patay na kini pag-abot.

Bisan sa kagamay sa maong isla wala madakpi sa kapolisan ang suspek apan gipasakaan nila kini og kaso kagahapon. (BANATNEWS)