CEBU, Philippines - Ang nadakpang tulisan ug ang namatay nga kauban niini nailhan na sa kapolisan kansang mga kaso nga naglakip sa robbery ug frustrated homicide andam nang ipasaka ngadto sa hukmanan. Kini ang nasayran sa Banat News gikan kang PO2 Alvin Fegarido sa homicide section sa Mandaue City Police Office (MCPO) sa follow up nga gihimo kagahapon.
Si PO2 Fegarido miingon nga ang nadakpan mao si Junie Caraat, taga barangay Ylaya sa dakbayan sa Danao samtang ang namatay sa engkuwentro mao si Marlon Andrino nga taga barangay Magay sa lungsod sa Compostela.
Matud pa ni Fegarido nga nagtuo sila nga dili lang pagpanulis ang gihimo sa maong mga suspetsado kundili pagpangarnap usab.
Dugang pa niya nga nakig-alayon usab sila sa uban pa nga mga buhatan sa kapolisan sa silingang lungsod sama sa Consolacion, Liloan, dakbayan sa Danao ug sa ubang lugar nga may pagpanulis o pagpang-carnap og motorsiklo nga nahitabo.
Sayo niini napusilan patay sa kapolisan si Andrino ug nasikop si Caraat dihang ilang gitulis ang tulo ka mga babaye sa dalan A.S. Fortuna sa barangay Banilad sa maong dakbayan ug ang usa niini gidunggab ni Caraat kay wala dayon mohatag sa iyang shoulder bag. Sa hot pursuit operation sa kapolisan misangpot sa pagginukdanay ug didto napusilan patay si Andrino ug nadakpan usab si Caraat.
Nagkagulkol na karon sa prisohan si Caraat ug andam nang ipasaka batok kaniya ang kasong robbery ug frustrated homicide. (BANATNEWS)