Bugas para basurero, citom, SPEED

CEBU, Philippines - Gibutyag ni Mayor Michael Rama kagahapon nga hatagan niya og tagsa ka sakong bugas ang mga basurero, metro aid, mga sakop sa Cebu City Traffic Operation and Management (CITOM) ug Squatters Prevention, Elimination and Encroachment Division (Speed) gumikan sa tulin nga pagdumala nila sa kadalanan sa daling paghipos sa basura ug sa pagdumala sa dagan sa trapiko samtang nagdagan ang adlaw sa nobenaryo hangtud na sa adlaw sa Sinulog niadtong Domingo.

Kahinumdoman nga ang mga basurero lang maoy nakadawat og incentive sa miaging tuig apan karong tuiga, ipalakip na sa mayor ang mga sakop sa CITOM ug Speed gumikan kay nakita niya ang maayong performance niini.

Giklaro hinuon sa mayor nga aduna pa’y ubang departamento ang iyang ipasusi kung angayan ba kining hatagan og incentive.

Nahimuot pag-ayo ang mayor sa gipakitang kakugi sa mga street cleaner tungod sa pagtuman sa ilang tahas nga dili maugmaan ang mga basura nga nagtipun-og sa kadalanan busa angayan lang nga pahalipayan sila.

“Ang uban intawon nila kay wala’y mga tulog aron lang malimpiyo ang atong kadalanan,’ matud pa sa mayor.

Samtang ang hepe sa Department of Public Services Engr. Dioniso Gualiza misaysay dinhi sa Banat News nga dul-an lang sa 200 ka tonilada ang nahipos nilang basura ug dyutay ra   kini kun itandi sa miaging tuig nga miabot sa dul-ang 300 ka tonilada.

Nagkanayon si Gualiza nga paspas ang paghipos karon sa basura gumikan kay maayo ang dagan sa panahon dili sama sa miaging tuig nga ang nakalangay sa ilang trabaho mao ang pagbunok sa uwan.(WC)  (BANATNEWS)