CEBU, Philippines - Nasagmuyo pag-ayo ang pangulo sa Department of Manpower Development and Placement (DMDP) nga si Fidel Magno gumikan sa kagamay sa budget nga gigahin sa konseho alang sa iyang departamento.
Sumala pa ni Magno nga dul-an sa P3.5 Million ang ilang target nga budget karong tuiga apan ang konseho mi-aprobar lang og P80,000.
Moabot ngadto sa P3.4 milyones ang budget nila sa miaging tuig hinungdan nga nakahimo sila og 43 ka mga jobs fair ug nakatabang sa mga walay trabaho kaniadto.
Nagkanayon si Magno nga ilaha karong gitun-an kung unsaon pag-igo ang P80,000 alang sa paghimo og jobs fair, employment seminars ug uban pang mga programa.
Dugang pa niya nga gikinahanglan gyud unta nga nga ma-upgrade ang ilang mga pasildad sa ilang training center aron mapalapad usab nila ang serbisyo sa ilang mga tinun-an.
Matud pa ni Magno nga kung mohimo sila og mega jobs fair, mogasto sila og dul-an sa P100,000 samtang ang jobs fair nga ilang himuon sa mga barangay mogasto og P25,000.
Si Konsehal Margarita Osmeña ug Mayor Michael Rama miingon nga pangitaan nila kini og paagi. (BANAT NEWS)