CEBU, Philippines - Ang programa ni Gobernador Gwendolyn Garcia nga Suroy-suroy Sugbo matag Enero gipangayo gayud sa mga balikbayan kinsa tuyo nga mianhi sa Sugbo alang sa fiesta ni Sr. Sto. Niño.
Kini ang gipahibawo ni Department of Tourism (DOT-7) Regional Director Rowena Lu Montecillo kinsa nahinangop sa nagkadaghang mga Balikbayan ug kaubanan gikan sa Estados Unidos ug Hongkong nga ania karon sa Sugbo.
Nalipay usab kaayo ang mga balikbayan ug mga kauban nilang langyaw tungod sa maayong pag-abi-abi kanila sa kagamhanan pinaagi sa gitukod nga komitiba nga misugat kanila sa tugpahanan sa Mactan sa wala pa ang Sinulog.
Ang maong komitiba gipangulohan ni Vice Gov. Agnes Magpale uban ang mga opisyales sa DOT nga gipangulohan usab ni Montecillo.
Sumala pa ni Montecillo nga nahimo nang batasan sa mga balikbayan ilabina ang gikan sa Estados Unidos nga human sa ilang pagsaksi sa Sinulog , gusto usab silang magsuroy-suroy sa mga nagkadaiyang tourist destination dinhi sa Sugbo.
Si Montecillo miingon nga ang Suroy-suroy Sugbo the Southern Heritage Trail nagustohan kaayo sa mga balikbayan sanglit daghan sila og masuroyan nga lugar sa kalungsoran ug sugaton sila sa madanihon kaayong pag-abi-abi sa matag lungsod nga ilang adtuon.
Ang Suroy-suroy Sugbo Southern Heritage Trail gipahigayon sa Enero 18 ngadto sa 20 niining tuiga.
Ang pamahayag ni Montecillo gidasunan usab ni Bise Gobernador Magpale kinsa miingon nga ang mga balikbayan nahigam sa programa sa turismo sa lalawigan sa Sugbo hinungdan nga nagkadaghan ang mga balikbayan nga mobalik dinhi sa Sugbo matag tuig.
Nasayran nga sila si Director Montecillo ug Vice Governor Magpale giubanan nila ni Cebu City Mayor Michael Rama, Mactan Cebu International Airport General Manager Nigel Paul Villarete ug uban pang mga sakop sa BALIK CEBU COMMITEE nga mihimamat sa mga BALIKBAYAN ug mga kaubanan niini didto sa airport sa Mactan.
Si Bise-Gobernador Magpale nga usa sa mga sakop sa Balik Cebu Committee miingon nga ang lalawigan sa Sugbo misuporta gayud sa ika-11 na ka tuig nga programa. (BANAT NEWS)