2 nakuyapan sa Sinulog Mardigras

CEBU, Philippines - Duha ka mananayaw sa Sinulog ang nadala sa tambalanan human kini makuyapi samtang nagsayaw sa Sinulog Mardigras kagahapon.

Ang mga biktima mao sila si Sofia Claire Hubahib ug Evander Salazar, pulos   sakop sa Zapatera Elementary School contingent.

Si kapitan Dave Tumulak sa barangay Basak, maoy dali kaayong mipasakay sa ambulansya sa mga biktima.

Hinuon dali ra kining naulian dihang nadapatan dayon og tambal sa mga mananambal sa Cebu City Medical Center.

Usa sa hinungdang nakuyapan ang maong mga dancer mao ang kainit sa adlaw. Samtang pipila sa mga langyaw nga nahinabi sa Banat News nagkanayon nga nalingaw kaayo sila sa Sinulog Mardigras.

Si James Nesci, 71, nga taga Tampa, Florida sa Estados Unidos nagkanayon nga aduna sila’y dakung festival sa ilang lugar apan lahi ang Sinulog.

Matud ni Nesci nga labing colorful ang Sinulog Mardigras dinhi sa Pilipinas ug ang mga costume sa mga contingent unique ug impressive kaayo, matud pa niya.

Si Nesci nga naminyo sa usa ka Filipina, miingon nga ikatulo na niya kining higayon sa pagtambong sa Sinulog dinhi sa Sugbo.

Gawas kang Nesci daghan pang mga langyaw nga turista ang nalingaw kaayo sa kalihokan sa Sinulog kagahapon. (WC)(BANAT NEWS)