3 Milyones ang midagsa

CEBU, Philippines - Miabot og 3 milyones ka mga tawo ang misaksi sa Sinulog Grand Parade kagahapong adlawa matud pang Sr. Supt.Melvin Ramon Buenafe ang Task Force Commander sa Sinulog 2012 ug hepe sa Cebu City Police Office (CCPO).

Matud ni Buenafe nga miabot og 3 milyones ang mga tawo niana nang alas-4 ngadto sa alas-5 kagahapon sa hapon apan sayo palang sa buntag miabot na og 1.5 ngadto sa 2 milyones ang mga tawo ug nagkaanam og kadaghan diha sa dalan.

Ang maayong dagan sa panahon maoy nakatampo og dako sa pagdagsa sa mga tawo ug tungod usab sa presensya sa mga artista sa mga dagkong floats.

Gihulagway ni Buenafe nga sa kinatibuk-an malinawon ang Sinulog ug gani alas-6 kagabii walay mga dagkong alarma nga gitubag ang kapulisan nga may kalambigitan ang Sinulog.

Matud niya nga ang rota sa Sinulog miabot man og lima ka kilometro nga gidasokan sa mga tawo lakip na ang katupad nga lane ug mga kasikbit nga kadalanan duol sa carousel route. (BANAT NEWS)