Seaman naamong patay kauban angol

CEBU, Philippines - Usa ka seaman ang namatay samtang ang iyang kauban ang naangol human sila gipamusil sa tulo ka armadong tawo nga gituohang sakop sa Alpha Kappa Rho (Akrho) niadtong Sabado sa buntag diha sa Sitio Suba, barangay Poblacion, Liloan.

Ang namatay mao si Randy Pilapil, 31, samtang naangol usab ang kauban niining si Arian Calo, 22, pulos lumolupyo sa nahisgutang dapit human sila pamusila sa tulo ka wala mailhing mga lalaki.

Si SPO2 Ernesto Pepito sa kapolisan sa maong lungsod nga nahinabi sa Banat News miingon nga nagsakay og motorsiklo ang mga biktima dihang gitaparan sa laing motorsiklo ug gipamusil sa mga nagsakay niini.

Si Pilapil dunay duha ka samad pinusilan sa ulo ug sa lawas samtang si Calo naigo sad sa walang bukton. Human niini ang mga mamumuno misutoy padulong sa lungsod sa Consolacion. Ang mga biktima gidala sa Eversely Child General Hospital sa barangay Jagobiao, dakbayan sa Mandaue apan si Dr. Carlos Wendel Romoga mideklarar kang Pilapil nga patay na pag-abot kanila.

Si PO2 Routchil Jugalbot mibutyag usab nga sa pasiunang imbestigasyon nasuta nga si Calo sakop sa usa ka fraternity samtang si Pilapil bag-ohay palang nauli sa miaging buwan.

“Kining seaman naapil lang kay ang puntirya gyud ani si Calo man. Gani lang dili siya ang napagan,” asoy pang Jugalbot base sa nakuha nilang impormasyon.

Kahinumduman si Jade Lirazan, 20, sakop sa Akrho nga taga Green Hills, barangay Poblacion gipusil niadtong Huwebes sa gidudahang sakop sa laing fraternity nga miresulta sa iyang kamatayon.

“Sa among nahibaw-an nahadlok ang nakapusil ni Lirazan nga mosumbong si Calo maong kinahanglan kuhaon (patyon) siya,” matud pang Jugalbot. (BANAT NEWS)