Gipatay sa tulisan

CEBU, Philippines - Patay ang usa ka lalaki human gipusil sa usa sa tulo ka tulisan nga mitulis sa iyang hinigugma kagahapon sa kaadlawon diha sa usa ka resto bar sa barangay Kasambagan siyudad sa Sugbu.

Si Juan Carlos Villordon, 27, taga Lipata, Minglanilla nakaangkon og samad pinusilan sa dughan ug patay na pag-abot sa Perpetual Soccour Hospital.

Sigun sa report sa Theft and Robbery Section (TRS) sa Cebu City Police Office (CCPO) ang biktima uban nila ni Sam Radimoda, 29, Kate Abella Rosta, 25, ug uyab niining si Aimee Gaye Sembrand, 25.

Subay sa imbestigasyon ni Insp. Rolando Pinili, hepe sa TRS nga alas 4 kagahapon sa kaadlawon ang upat paingon nang mamauli dihang giduol sa usa ka wala mailhing lalaki ug gikuha ang Nikon D300 (DSLR) Digicam nga nagkantidad og P32 mil ni Radimoda dayon gisunod og kuha ang gold necklace ni Rosta.

Apan sa dihang gilabni na ang bag ni Sembrand misukol kini nga miresulta sa pagkalamba sa dalaga hinungdan nga milaban si Villordon ug gilayog ang tulisan.

Apan ang tulisan mibunot og wala matinong kalibre sa armas ug gipusil si Villordon dayong diretso og sakay sa nagpaabot nga kauban sa motorsiklo ug miikyas.

Ang bag ni Sembrand narekober sa kapulisan sa luyo sa sakyanan sa biktima nga gi-parking duol sa nahitaboan.

Usa ka lalaki ang giimbitar sa TRS nga gidudahang may kalambigitan sa hitabo, samtang nakarekober usab og motorsiklo ang kapolisan nga gidudahang maoy gisakyan sa mga tulisan. Padayon pa ang imbestigasyon sa krimen. (/EIM)(BANAT NEWS)