Kinitaan sa PENRO misaka
CEBU, Philippines - Mokabat sa P1.2 milyones ang kinatibuk-ang kita sa Provincial Environment and Natural Resources Office ( PENRO) sa lalawigan sa Sugbo sa tuig 2011.
Sigun sa report ni Nerces Bispo, ang Officer In Charge sa PENRO nga ang maong kantidad gikan sa multa sa mga gipangdakop nga mga dump truck nga nakalapas sa lagda sa trapiko.
Sagad sa basehanan sa pagbayad og multa sa tag-iya sa nasikop nga mga dump truck mao ang paglapas sa Provincial Ordinance 2008-10 diin nalatid nga dakpon sa mga operatiba sa lalawigan kadtong mga dump truck nga walay delivery receipt; nagkarga ug mga material nga walay permit ug kadtong mga dump truck nga wala mosunod sa gilatid nga gitas-on o ug gidak-on sa dump box.
Matud pa ni Bispo nga mikabat og 123 ka mga dump truck ang nadakpan sa mga operatiba sa PENRO sa milabay’ng tuig gumikan usab sa hugot nga kamandoan ni Gobernador Gwendolyn Garcia. (BANATNEWS)
- Latest
- Trending
