Hospital ipatukod sa Compound sa CCPO

CEBU, Philippines - Gipahigayon kagahapon sa buntag ang ground breaking sa tukorong hospital sulod sa compound sa Cebu City Police Office (CCPO) nga gitambongan ni Police Director General (PDG) Nicanor Bartolome.

Si Dr. Expedito Medalla sa Department of Health (DOH)7 nagkanayon nga ang maong tambalanan usa ka proyekto sa DOH nga gigahinan og P8.8 milyones.

Hinuon matud pa ni Bartolome nga ang Philippine National Police (PNP) mangita og budget aron madugangan ang gahin sa DOH ug himoong upat ka andana ang tukorong tambalanan uban sa kompletong mga kahimanan niini.

Si Bartolome nga nahinangop kaayo sa maong proyekto nagkanayon nga mangita siya og paagi nga makahipos og dugang P100 milyones alang sa hingpit nga kahumanan sa maong proyekto nga gitakdang sugdan niining tuiga. 

Matud pa ni Bartolome nga duol kaayo sa iyang dughan ang maong proyekto tungod kay dako kaayo og kaakohan niini ang iyang kapikas sa kinabuhi nga si Dr. Noemi Bartolome.

Mapasalamaton usab siya kang Dr. Susana Madarieta, hepe sa DOH Central Visayas tungod sa suporta niini ngadto PNP.

“The construction of this hospital will truly be of great help not only to PNP members in the region but to their dependents as well”, ni Bartolome pa. (BANATNEWS)