Oposisyon nadismaya sa speech ni Soc

CEBU, Philippines - Ang mga konsehal nga oposisyon sa dakbayan sa Talisay nadismaya sa pamahayag ni Mayor Socrates Fernandez atol sa regular session sa konseho niadtong Martes sa buntag.

Si Konsehal Romeo Villarante nagkanayon nga nadismaya siya kay wala ilakip sa mayor ang lista sa mga proyekto sa mga inprastraktura nga tukoron alang   sa kalamboan sa siyudad.

“His speech lacks on infrastructure projects. These basic projects will pave the way for the development of Talisay”, ni Villarante pa.

Ang bahin sa mga proyekto sa drainage ug road network sa siyudad maoy gitumbok ni Villarante nga wala ikasulti sa mayor ug uban pang mga programa alang sa kauswagan.

 Si Mayor Fernandez mipasigarbo sa mga kalamboan sa edukasyon, panglawas ug ang pagpamalit og mga lote sa lokal nga kagamhanan nga matukoran og mga balay sa mga wala’y pinuy-anan.

Matud sa mayor nga ang siyudad maoy may labing daghang tunghaan sa elementarya ug high school sa tibuok rehiyon ug gihangop niya si Kongresista Eduardo Gullas kinsa usa sa naningkamot nga makawhat ang maong kalamboan.

Gibutyag sa mayor nga ang siyudad migasto og minilyon ka pesos alang sa pag-atiman sa mga masakiton ug laing minilyon ka pesos alang sa mga yuta nga kapuy-an sa mga kabus.

Matud usab sa mayor nga sukad pa kaniadto dihang ang Talisay usa pa ka lungsod mikabat na sa P68 milyones ang napagawas nga pundo sa kagamhanan alang sa mga programa niini nga gitumong sa pagtabang niadtong mga molupyo nga wala’y mga balay. Apan base sa ulahing talaan sa local housing office aduna pay 11,000 ka mga pamilya sa Talisay ang wala’y mga lote ug kapuy-an.

Ang mayor midugang nga tungod sa nahisgutang programa napili siya sa Department of Social Welfare isip outstanding mayor sa milabay’ng tuig. (/WC)  (BANATNEWS)