Magbantay sa mini nga tiket

CEBU, Philippines - Gikabalak-an karon ang posibling pagtumaw sa mga ipalusot nga mga fake o mini nga mga tiket sa Sinulog sa grandstand sa Cebu City Sports Center atol sa Sinulog Grand Parade ugma, Domingo.

Nunot niini gipahimangno-an ang publiko nga dili magpasagad og palit og tiket ug sigurohon lang nga anha mopalit ning maong mga tiket sa Sinulog Foundation Office aron dili mabiktima sa pagpangilad. Giangkon ni Dolly Delmar sa Sinulog Foundation dihang nahinabi sa Banat News nga dili gyud kalikayan sa matag pagpahigayon sa Sinulog grand parade matag tuig nga may mga badlongon nga mopalusot sa pagpamaligya og mini nga ticket aron sila makasapi.

Dugang ni Delmar nga matag tuig nga grand parade sa Sinulog aduna gyud silay masakpan sa entrance nga mosulod sa sports center nga magdala og mini nga tiket nga ilang pinalit gikan sa mga tawong way pagtugot sa kagamhanan.

Sa pagkakaron labing gihigpitan ang siguridad nga ipatuman sa Sinulog Foundation sa entrance sa Cebu City Sports Center ug mahimong problemado kadtong mga tawo nga makapalit og mini nga tiket.

Ang labing maayo nga panid-an kun si kinsa ang mamaligya og mini nga tiket aron sayon ra kining masikop sa kapolisan

Gipasabot sab ni Delmar nga walay laing outlet sa tiket nga gitugotang makapamaligya gawas sa   Sinulog Foundation.  (BANATNEWS)