Amerikano ug polis gipriso

CEBU, Philippines - Usa ka American national kinsa giingong kanhi sakop sa US Marine gipriso sa kapolisan human kini manghasi sa barangay kapitan sa San Roque, dakbayan sa Talisay sa miaging Huwebes sa hapon.

Ang suspetsado mao si Steven Scott, 46, minyo ug temporaryong nagpuyo sa maong dapit. Sumala sa kapolisan nga si Scott kinsa hubog kaayo sa maong higayon miadto sa balay ni Kapitan Antonio Cabrera ug nagsinggit-singgit og bastos.

Busa gibadlong kini ni Cabrera , apan imbis mokalma nanghagad na hinuon og sinumbagay ug nanghulga pa sa pamilya sa kapitan nga nagkanayon “I will kill you”.

Gawas kang Cabrera ug sa pamilya niini gihulga usab sa maong Amerikano ang mga kagawad sa barangay nga sila si Rafael Chan Jr. ug Ernesto Reyes lakip sa mga tanod nga sila si Samuel Batican, Placia Daan Jr., ug Matias Antifuesto.

 Sa imbestigasyon sa mga polis si Scott kinsa giingong hubog kaayo, isog kining miadto sa balay sa kapitan ug nagsinggit-singgit ug dili maayong mga pulong.

Si Cabrera mipasangil nga puwerting isoga sa maong langyaw kay ultimong tugaok sa manok mohiwasa kini sa kasuko. Mga kasong gisang-at batok ni Scott mao ang direct assault, pagbinastos ug pagpanghulga. Nagkagulkol siya karon sa prisohan sa Talisay.

Samtang sa laing bahin usa ka polis nga sakop sa Special Weapons and Tactics gisikop sa kapolisan sa dakbayan sa Sugbo human kini manghasi ug nangulata og sibilyan sa barangay Kamagayan dakbayan sa Sugbo sa miaging gabii.

Ang suspetsado kinsa nagkagulkol karon sa prisohan mao SPO1 Roberto Pepito sakop sa SWAT team sa dakbayan sa Lapulapu.

Matud pa ni Sr. Supt. Ramon Buenafe , hepe sa Cebu City Police Office nga iya dayong gipadis-armahan sa 9mm pistol uban sa mga buhing bala niini ang maong polis. Kini human niya madawat ang report sa katawhan sa Kamagayan, hinungdan nga iya dayon kining gipabalhug sa prisohan. (Uban sa report ni Rey Pasaporte /WC) (BANATNEWS)