Abusadong taxi driver silotan

CEBU, Philippines - Gipasidan-an sa Land Transportation Office ang mga drayber sa taksi sa Sugbo nga dili mamili og pasahero karong mga panahona nga saulogon ang pista sa Senyor Sto. Niño.

Si LTO-7 director Raul Aguillus dihang nahinabi sa Banat News nagkanayon nga gipatuman nila og balik sugod kagahapon ang programa nga Oplan Esnabero.

Tumong niini aron bantayan ang mga drayber sa taksi nga mamili ug mamakyaw sa pasahero tungod sa gipanglantawang pagdagsa sa mga pasahero lokal man o langyaw tungod sa Sinulog maong daghan og kapilian ang mga drayber.

Giawhag ni Aguillus ang mga pasahero sa pagkuha dayon sa plaka ug pangalan sa taksi ug isumbong kini sa ilang buhatan. Samtang gikinahanglan usab nga moisyu og resibo ang taksi bisan dili mangayo ang pasahero. (BANATNEWS)