P2 mil nga subsidiya gihangop

CEBU, Philippines - Gihangop sa pundok sa mga drayber dinhi sa Sugbo ang dugang tag P2 mil nga subsidiya sa gobyerno alang sa Pantawid Pasada Cards sa tanang mga drayber sa nasud.

Si Benjamen Ryan Yu ,chairman sa City Transport Cooperative (CITRASCO) mibutyag sa Banat News nga gihangop nila ang bisan unsang tanyag nga ayuda gikan sa gobyerno aron makatubag sa kalisud nga ilang nasinati gumikan sa kaminus sa ilang kita nunot sa walay puas nga pagsaka sa presyo sa lana.

Apan bugtong gipanghinaut ni Yu nga unta madawat gyud sa mga benepisyaryong mga drayber ang maong subsidiya ug kahatagan usab unta kadtong uban pang mga drayber nga wala pa makapahimus sa maong ayuda.

Gibutyag ni Yu nga sa pagkakaron daghan gihapon sa mga drayber nga nakadawat na sa Pantawid Pasada cards sa unang batch apan hangtud karon wala gihapoy sulod nga kuwarta ang maong mga cards.

Dugang gipasabot ni Yu nga ila na kining gidangop sa rehiyonal nga buhatan sa Department of Energy (DOE)-7 apan wala silay nahimo.

Kini tungod kay sumala sa DOE dinhi wala silay control sa mga cards kay ilang mang ulohang buhatan sa Manila maoy nagpadagan niini.

Nanghinaot si Yu nga masulbad na kining maong problema sa pag-release unya sa ika-duhang batch sa maong   ayuda nga tag P2 mil ug unta maatiman sa kagamhanan ang   mga drayber nga wala pa maisyuhi og pantawid pasada card.

Miingon si Yu nga sa pagkakaron andam ug tagana ang mga drayber pagdawat sa bisan unsang ayuda gikan sa gobyerno tungod kay naglisud na sila gumikan sa kagagmay nalang nila og kinitaan matag adlaw samtang misaka pag-ayo ang presyo sa mga palitonon ilabi na sa pagkaon. (BANAT NEWS)